Beiträge mit Schlagwort “Zeedel

onYva-Zeedel 2015: G.N.U. – Gib nid uff

Wer uns am Cortège verpasst hat. Oder wer von uns keinen Zeedel verpasst bekommen hat – unter dem Bild könnt ihn meinen onYva-Zeedel in digitaler Form nachlesen.

Und hier gibts meinen Text «Was ich an der Basler Fasnacht liebe», den ich für VICE geschrieben habe.

IMG_6278

G.N.U. – Gib nid uff

D Stadt isch ruhig, kai Windli waiht
Kai Sunnestraahl, kai Güggel kraiht
Dr Bode bebt und Schyybe zittre
Es donnered als wurds go gwittre
E dunkli Front am Himmelhoof
Verschreggt grad die verschupfte Schoof
Wo stuunend steehn am Stroosserand
Si gseehn si ko – e schwarzi Wand
Die walzt sich vorwärts, kunnt im Nu
Denn sinn si do, die wilde Gnu

Das Bild, dä Biss, die Poesyy
E woors Gedicht – so muess es syy!
So subversiv, mit Intelläggt
Subtil, debil und doch diräggt
Dä Zug, das Goschdyym, s passt perfäggt!
Dä Gaischtesblitz verdient Reschpäggt.

Nur aini isch ganz durenand
Drbyy kunnt die nid mol vom Land
So stooht döört ganz verdattered
Mit me Gebiss wo glappered
D Frau Sarasin am Stroosserand
Voll Zwyyfel iiber iir Verstand:
Die onYva, s isch unerheert
Wie die jetzt do dr Cortège steert!
Es glepft, es raucht, s isch ai Radau
E Härde Gnu, e bitzli blau
Jä Sinn das Schlimpf, y gseehs nid gnau?
Do druss wird wiirgglig kaine schlau
Dä Kaktus döört git au kai Sinn
Är drummled wild – y glaub y spinn
Als ob das noonig gniegend wär
Pfyfft vorne draa e Legionär
Und zwischeninn, s isch wie im Waan
E Meerjumpfere – filigran
Fascht wien e Hirt wirft die dr Stogg
Und danzt in iirem Schuppe-Rogg

Do hauts aim fascht dr Nuggi uuse
Dr Sarasin blybt nur no s Gruuse
Si schimpft und speyt grad Gift und Galle
Will kain das Sujet doo ka schnalle
Drum will si jetzt e Zeedel kralle
Dr Vortrab wird grad iiberfalle
E Schrey, e Schlag, denn gheert mes knalle
Si zaigt dr Zeedel, foot aa lalle
Doch kain verstoots, die Wort verhalle
Will iir Gebiff isch uusegfalle

Grad nääbe dere alte Grytte
Foot s Bublikum jetzt aa mit strytte
Die Gnu sinn doch, sait aine hässig
Als Sujet huere chaibe gschpässig
Die Glygge, s gooht mr geg dr Strich
Will, dass ych mir dr Kopf zerbrich
Die stiirme tobend um dr Egge
Und maine, dass mir das denn tschegge
Gib Bier statt Gnu! Nid iiberlegge!
Die Viicher solle grad verregge!

Ganz anderscht gseeht das s Annegreet
Wo straahlt wien e scheen Bluemebeet:
Dä Schlumpf, die Gnu, dä Legionär
Das Zämmeschpiil isch legendär!

Doch was die Lytt jetzt noonig wisse
Si wärde laider grad bitz bschisse
Fiir alli, wo dr Sinn vermisse
Dien mir jetzt mol dä Helge hisse:
«G.N.U.» stooht do fir «Gib nid uff»
Au nid im allergreeschte Buff
Dr Zuesatz, wo eych woohl nid gfallt:
«Es het e jede schon e mol e Sujet nid gschnallt»
Das isch e sanfte Stich in d Sytte
Geg all die gschyyde Dängger-Glygge
Äxgyysi fir dä frächi Tritt
Mir wänn gar nid, dass es Sinn gitt!
www.onyvabasel.ch

IMG_6303

Advertisements

Meine Fasnacht 2013 in Bildern, Reimen und Videos

IMG_8294

Und schon ist sie wieder passé, die Basler Fasnacht 2013. Bei der onYva jagte ein Höhepunkt den nächsten und es darf getrost von einem (weiteren) legendären Jahr gesprochen werden. Hier noch ein paar Impressionen sowie – wie allewyyl – mein Zeedel.

Sujet: Dasch dr Zipfel – vyyl Lärm um Hyt

IMG_8291Hösch, Bebbi, y hoff y bi nid vorlut
Kumm, sag doch rasch: Wie heschs mit dr Vorhut?
Isch alles no draa an dyner Zipfelkappe?
Oder hesch en scho abgää, dä winzig Lappe?
Jä wäge däm Ding grad näbe dym Seggel
Gänn sich neyerdings stuuri Grind uf e Deggel
Juude und Moslem gege Aawält und Ärzt
En uuralte Bruuch wo ainigi schmärzt

Schnibb-schnabb Vorhut ab, scho gseen alli rot
Biebli ans Riebli, und das ooni Not?!
Richter in Köln sage, dass das nid goot
Juude und Moslem wänn dass mr sy loot

Es sig halt e Bruuchtum, das Schnibble am Zipfel
Drum nämme sie s cool – andri findes dr Gipfel
Die Glaine die miesste halt unverseert blyybe
Bis si son e Yygriff elai unterschryybe
Und wär widerspricht, jä dä wurd untertryybe
Wär Biebli verletzi dä haigi e Schyybe
Sy maane: Bi Binggis verstosst das geg s Grundrächt
IMG_8344Die andere glaage und saage s syg ungrächt
Und nenne drbyy iiri Freyhait vom Glaube
Und iiri Kultur wo me so wurdi raube
Die kenni me nid e so aifach beschnyyde
Das miesst me vermyyde wil d Biebli nid lyyde
E Schnittli in Eere, e Zipfel fir Gott
Was d Gschicht ys kennt leere, das ka kai Verbott
So strytte sy flyssig um s Wool vo de Glaine
Die Froog bewegt d Wält, das kennt me fascht maine
Vyyl scheener isch doch, näbe jeedere Mainig
D Juude und d Moslem sinn sich emol ainig!

Im Kaffi vom Heidi gits haissi Debatte
Die ainti will ganz klar e Kappe fir d Latte
Jä nid so bim Vrony, die will unden ooni
Das sygi en Yygriff wo sich fir sy looni
Dr Walti vom Stammtisch grad näbe däm Gränzli
Hett mitgloost und dänggt sich: das wärs doch firs Schwänzli!
IMG_8292Är seggled zem Doggter und sait em denn ghetzt
Y will unters s Mässer – mach «Free Willy» jetzt!

Dr Limmel liggt schlaff und entschpannt uf em Schraage
E Lampe, wo bländet, e fuuls Gfyyl im Maage
Mit naggige Lände – kenntsch aagnäämer warte
E Schweschter wo läched, me wurdi grad starte
Denn Dupfer, Skalpell – jä, s isch langsam Zyt
Aber dr Doggter sig noonig so wyt
Är stoot numme do und zittered blaich
Dr Walti, nervöös, dänggt: mach mr kai Saich!
E Pfyffli wie dä sell mi Zipfel rasiere?
Drbyy kennt deert unde jo so vyyl passiere!
Dr Doggter sait duuch, und hyylt drbyy fascht
Das Uurdail us Köln sig fir iin Balascht
So dass är kai Aichle me stutzt an däm Mascht
Är wurdi jo gärn – aber will nid in Knascht
Dr Walti liggt do und ka numme lache
Und dänggt: hätt-y das doch als Kind scho lo mache

Mehr zur Clique gibts unter www.onyvabasel.ch. Hier zudem noch die Morgestraich-Artikel über onYva auf Bazonline und bei der bz.

PS: Am Zyschtig war natürlich einmal mehr Schabernack mit dem Neyen Zyschtigs Ziigli NZZ angesagt. Einer der Höhepunkte: Das Rollator-Rennen am Spalenberg…

IMG_8362


onYva-Zeedel 2011: Eeländ – mir verregge

Ganz schwarz mi Mantel, schwarz mi Seel
Bi voller Graft e glai Juweel
Dangg mir isch d Wiirtschaft quiitschfideel
Jä do druss macht hitt kain e Heel
Drum nenne si mi schwarzes Gold
Will wär mi bsitzt, däm syg s Gligg hold
Dr aint hett Fraid am volle Tangg
Dr ander wird drvo nur grangg
Doch hesch vyyl Eel-Gäld uf dr Bangg
Empfindsch mi Abgaas nimm als Gschtangg

Y sags drum gärn: bi schwarz und stolz
E Graftstoff wie us Ebeholz
E jeede bruucht mi fir si Daag
Drum sueches mi an jeeder Laag
Au dief im Meer gseen ych se boore
Drbyy hänn die do nyt verloore
Kai Wunder kunnts zem Super-Gau
Jä Gyyr macht blind und oft nid schlau
Wenn alli sich um Roohstoff strytte
Denn zaigt sich mini dunggli Sytte

E schwarze Glumbbe liggt im Sand
Halb uffrächt, doch mit schweerem Stand
Drvor e Kunschtfrind, hoch im Rang
Wo maint, är macht dr grossi Fang
Ooh lueg, wie scheen! Das Wärgg, do wett y
S isch sicher ains vom Giacometti
So schwarz und schwäär, erstarrt im Meer
Doch wart, es läbbt! Si Bligg isch leer
Dä dunggli Flägg umgää vo Dunscht
Isch dämfall doch kai Freyluftkunscht
Es isch e Vogel, voll vrgläbbt
Wo mee scho doot isch, als er läbt
Är grächzt und grääit und griecht voraa
Obwohl ihm kain me hälfe ka
Y sag ganz duuch, es däät mr laid
Wäg däm sym scheene Fääderglaid

Jä so vyyl Eel verdrait nur aine
Dr glatti Hakin, wurd y maine
Wär är am Strand mit sine Hoor
Denn gäbts fir d Tierli do kai Gfoor
Will siini Strääne absorbiere
Was anderi im Meer verliere

E Schelm wär dänggt, dass die wo s Eel hänn
All das Eeländ soo nid gsee wänn
Doch iiri Finger blyybe eelig
Es lauft wie gschmiirt, das Gschäft macht seelig
Ihr Job isch nid im Gwisse z boore
Drum ischs egal, goot bitz verloore
Doch aines Daages goot ne s Eel z änd
Denn daile mir is wiider s Eeländ
Mir hänn si ussprässt wien e Druube
Jetz ka me nimmi änger schruube
In allne Pipelines schteen d Turbine
Und d Wält gseet uss wien e Rosine

www.onyvabasel.ch


Ach-Mann-isch-das-schaad

Auch dieses Jahr habe ich den Zeedel für Basels beste Stammclique gedichtet. Mein fünfter Lälli-Zeedel ist leider auch mein Abschiedsgeschenk an die Clique, denn seit Jüngstem bin ich ja kein Lälli mehr. Irgendwie schade, aber nun freue ich mich auf eine Fasnacht in einer brandneuen, taufrischen, unverschämt intelligenten und ausserordenlich sexy Formation…die notabene noch keinen Namen hat (Vorschläge sind willkommen). Hier also *tätääää* der Lälli-Zeedel 2010…irgendwie passte das Sujet (hoffentlich schaff ichs auf Al Jazeera;)

Lälli 2010: Ach-Mann-isch-das-schaad

S wird Morge iiber dr Kasäärne,
Dr Halbmond singgt und mit im d Stäärne,
Im Klingeli, do dööse d Grytte,
E-n-Amsle pfyfft, gheersch niemert strytte,
Und wysawyy bi dr Moschee,
Kämpft sich dr Yusuf duur dr Schnee,
Vrbyy an lääre Wysswyy-Fläsche,
Ässe-Räschte, Zygi-Äsche,
Und denn – är gheyt fascht uff dr Latz –
Lyt do-n-e Gschtalt zmitts uff em Platz.
Jä guete Morin, sait dr Bäärtig,
Was tryybe sii so frieh am Wäärtig?
Isch s denn begwääm im Schärbehuffe?
Si sotte Tee statt Wysswyy suffe!
Dr Guy stoht uff, beglagt sy Kopfweh,
Är haigi träumt und denn e Gott gseh.
Dää syg erschiine an sym Bettli
Und haig verzellt vom Minarettli,
Wo s ney jetz gäb, gnau grad do oobe,
So syg er gschwind do ane gflooge.
Är haig halt welle live drbyy syy,
Wenn ain do luthals Allah pryysi.
Doch denn, oh Schrägg, dr Guy wird wach,
Är schreyt und gheyt vom Giibel-Dach,
Kai Duurm, kai Gsang, kai Muezzin,
Si Draum isch platzt im Sunneschyyn.
Är ryybt si Schädel, fluecht in Schnee:
D Kasäärne kan-i nimme gseh.
Jä immer wenn my Gspyyr versait,
Holt sii mi zrugg in d Wirggligkait.

Worum die Diirm per Gsetz verbiete?
Die kennt me doch so lyycht verhiete,
Indäm me si loot bryyswäärt blaane
Vo dääne baide Veteraane,
Wo d Mäss-Keschte hänn gschprängt wie Kette
Und jetzt dr Roche-Duurm minarette.

Eb Kircheduurm, eb Minarett,
Ain motzt immer – jeedi Wett.
Drbyy gits so vyyl Parallele,
Die sotti me de Lyt verzelle.
S het im Koran nid wenig Stelle,
Wo au fir d Grischte eppis zelle.
S isch dumm, wär maint, är gseet e ’Faind’,
Meh Sinn ergäbt e grossi Gmaind:
Im Chrislam wär e jeede fromm,
Sait: inschallamen, inschalom.

Dr Mahmud fluecht, starrt uf sy Händi:
Jä hänn die Demos nie en Ändi?
Jetzt stand i do, elai im Gwitter,
Und wird verschpotted via Twitter.
Im Netz ka halt scho jeede peeble,
Doch dass si mi grad däärart ’veegle’.
Han i nid dänggt und bi empeert:
Oh Allah sag, was lauft verkehrt?
Und Allah sait: Du bisch nimm z rette!
Was bringt e Volgg, wo schwygt in Kette?
Es bruucht e Rugg, do druff kasch wette,
Sunscht blybsch du nur e Marionette.
Versprich mir drum: Heb Sorg zem Glaube,
Dä deerfsch du nid als Waffe raube.
Effne dy Härz und dyni Auge,
E so kasch guet dy Bligg entstaube.
Mahmud, geheersch was ych dir saag?
Was? Nid! Ach, Mann isch das schaad!

In Gryysezyte loodreds wiider,
Jä die wo zinsle, gänn sich biider.
Si spyyre Angscht in iire Gliider
Und schyyre Panigg – immer wiider.
Unter Moslem oder Grischte
Gits halt laider Extremischte,
Doch – mir hänn s scho immer gsait:
Die sinn in dr Minderhait.
Denn Glaube haisst, sy Friide finde
Und nid vor Hass und Angscht erblinde.
Freyhait findsch nid dur Verbott:
Unsre isch au eure Gott!

Euch allen eine schöne Fasnacht und bis bald…